Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

    Халқ томонидан кўплаб дуолар олаётган президентимиз Шавкат Мирзиёев ташаббуси билан давом этаётган Қуръон мусобақаси гўзал Қўқон шаҳрида ўз якунига етди. Мингдан ортиқ Қуръонга муҳаббатли томошабин йиғилган “Дегризлик” жоме масжидидан кеч бўлса-да, онахонлар ва опа-сингиллар тарқалай дейишмасди. Қўқон бош отинойиси Жамилахон опа Охунова айтишича, масжид ичкарисига 600 ўрин ҳозирланган эди. Аммо нафақат ичкари, ҳатто масжид ҳовлиси-да кузатувчи аёл-қизларга тўлиб-тошди. Уларнинг кумуш қиш ҳавосида тўшаб қўйилган кўрпачаларга ўраниб ўтирганларини кўриб, кучли ихлосли, мустаҳкам эътиқодли Қўқон аҳлини яхши кўрмай бўлмайди.

Алоҳида айтиб ўтишимиз керакки, Қўқондаги Қуръон мусобақаси ҳақиқий байрамга айланиб кетди. “Муслимаат.уз”нинг салавотчи қизлари байрамона беллашувга янада шукуҳ улашди. Ижодкор Қўқон аҳли гўзал нашидларга жўр бўлиб, завқ устига янада завқ қўшдилар.

Шом намози ўқиб бўлингач, ҳайъат аъзолари қадимдан илму ҳикматга кон бўлган қўқонлик 79 та иштирокчилар орасидан муносиб ғолибаларни танлаб олишлари бироз қийинчилик туғдирган бўлса-да, ниҳоят, юқори ўрин соҳибалари аниқланди.  

Демак, ҳифз йўналиши бўйича ғолиба (18-25 ёш, 1 та):

1-ўрин: Муйдинова Мубинабону Маҳмуджон қизи

26-40 ёшли аёл-қиз иштирокчилардан ғолиба (1 та):

2-ўрин (аммо 1-даражали диплом эгаси): Вахабова Зиёдахон Рустамовна

Тиловат йўналиши бўйича эса (18-25 ёш, 35 та):

1-ўрин: Эрназарова Муслимахон Аҳаджон қизи

2-ўрин: Муҳаммаджонова Мадинахон Равшанжон қизи

3-ўрин: Обидова Дилнозахон Баҳодиржон қизи

26-40 ёшли иштирокчилардан ғолибалар (42 та):

1-ўрин: Акбарова Оминахон Фазлиддин қизи

2-ўрин: Хошимова Фотима Аброровна ва Мирзаалимова Мухсинахон Фазлиддин қизи

3-ўрин: Расулова Мохидил Музаффаровна

Эртага 8 феврал куни Фарғона вилояти туманларида яна Қуръон қироати мусобақалари давом этади.

“Қайноқ” хабарларни биз билан кузатинг.

Зуҳрахон ҲАМДАМОВА