Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

  Шу йилнинг  22 август куни Москва шаҳрида Шайх Муҳаммад Содиқ Муҳаммад Юсуф номидаги мусулмонлар Диний-маърифий маркази, "Аль-Васатийя ‒ мўътадиллик" илмий-маърифий маркази  ва психологик ёрдам Бирлашмаси ҳамжиҳатлигида ташкил этилган тадбир бўлиб ўтди. Тадбирда юртимиз вакиллари “Шайх Муҳаммад Содиқ Муҳаммад Юсуф” масжиди имом-хатиби Исмоил Муҳаммад Содиқ Муҳаммад Юсуф, Ўзбекистон мусулмонлари раиси маслаҳатчиси Абдулҳакимқори Матқулов, Ўзбекистон мусулмонлари идораси Котибият бўлими бош мутахассиси Муҳаммад Аюб Ҳомидов қатнашди.

Тадбирда Марказий Осиёлик муҳожирларнинг таълим-тарбияси, маънавият ва маърифати масалаларига эътибор қаратилиб, Шайх Муҳаммад Содиқ Муҳаммад Юсуф илмий меросини тарғиб этиш жамиятимиз ва келажагимиз учун тарбия манбаи, соғлом эътиқод хазинаси бўлиб хизмат қилиши иштирокчилар томонидан эътироф этилди. Шунингдек, муҳожирларга психологик ёрдам кўрсатиш ва уни амалга ошириш усуллари муҳокама қилинди. Бу фаолиятга нафақат мусулмонларга психологик ёрдам бериш Бирлашмаси мутахассислари, балки  МГППУ Шарқий Психология Магистратураси талабалари ҳам жалб этилиши қайд этилди.

Тадбирда Россия диний идоралари вакиллари, Ўзбекистон, Тожикистон, Қирғизистон, Қозоғистон Республикалари вакиллари, маданият марказлари ходимлари, теологлар, психологлар, шунингдек, бир қанча ОАВ ходимлари қатнашди.                                                                                           

Эслатиб ўтамиз, Шайх Муҳаммад Содиқ Муҳаммад Юсуфнинг бир неча асарлари рус тилида чоп этилган: “Тафсир Хилал” (Қуръон каримнинг шарҳи), “Хадисы и Жизнь”, “Ийман, Ислам, Куръан”, “Суннитские вероубеждения”, “Истина о сути гадания”, “Васатыя – путь жизни”, “Счастливая семья”, “Открытое послание”,  “Заем и связанные с ним вопросы”, “Разногласия: причины и решения”.