Турмушга чиқиш

23:52 / 28 июнь | Chloe | 148
Ассалому алайкум! Турмушимдан ажраганимга 13 йил бўлди. Жанжал билан ажрашганимиз учун эрим «талоқ қилдим» деб айтмаган ва бу маънода гап ҳам бўлмаган. Ҳозир у оилали. Мен эса ҳали ҳам ёлғизман. Алҳамдулиллаҳ намоз, рўза, истиғфору саловатни, Қуръон ўқишни, Аллоҳдан сўрашни канда қилмайман. Саволим шуки, эшитишимча агар эри талоқ қилмаса орадан йиллар ўтса ҳам унинг никоҳида бўлар экан ва бахти ҳам очилмас экан. 1. Ростдан ҳам шундайми ёки бу тақдирми? 2. Агар тақдир бўлса бахтни очиш турмушга чиқиш учун ўкиладиган дуолар борми? Аллоҳим илмингизни зиёда қилсин. Олдиндан раҳмат.
Одинахон Муҳаммад Юсуф:

– Ва алайкум ассалом!  Тушунчангизда бироз чалкашлик бор. Агар эри уни талоқ қилмаса, ўртада никоҳ бузилмайди. Бу шаръий ҳукм. Бахти очилмайди, деган гап йўқ. Тақдир масаласи бошқа масала, никоҳ масаласи бошқа. Сиз бошқа турмуш қуришингиз учун ўша одамдан талоқ олишингиз керак. Кейинги турмушингиз тўғри бўлиши учун ва гуноҳ қилмаслик учун. Бахтим очилмаяпти, қандай дуо ўқишим керак, демасдан, ўша кишидан жавобингизни олиб бошингизни очинг, иддангизни тугатиб, бошқа кишига турмушга чиқинг.  Валлоҳу аълам!