Қуръон ҳатми

03:16 / 04 июль | Oysha | 212
Ассалому алайкум! Араб тили тажвидини ўрганганман, аммо араб тили ҳарфларини танисам ҳам ҳали тушуниб ўқий олмайман. Аллоҳнинг каломини янада тушуниш мақсадида бир марта ўзбекчасини ўқиб чиқдим ва маънан жуда ҳам катта озуқа олдим. Шунга ўзбек тилидаги таржимасини ўқиганим ҳам Қуръон ҳатмига ўтадими?
Одинахон Муҳаммад Юсуф:

– Ва алайкум ассалом!

«Хатм» тугатиш, якунлаш деган маънони билдиради. «Хатми Қуръон» деганда Қуръони Каримни бошдан-оёқ тўлиқ ўқиб чиқиш тушунилади. Бирорта сура ёки оят ташлаб кетилса, том маънода хатм ҳисобланмайди. Шунингдек, Қуръонни ўзи нозил бўлган тилда – араб тилида ўқиб чиқилгандагина, хатми Қуръон қилган ҳисобланади, таржима ё тафсирини ўқиб чиқиш, гарчи буюк ажру савобларга эга амал бўлса да, хатми Қуръон саналмайди. Чунки Қуръоннинг маъноси ҳам, лафзи ҳам Аллоҳ таолодан. Уни бошқа тилга ўгирилганда маъноси ифода топса ҳам, лафзи ўзгаради, бузилади ва Қуръонлиги йўқолади.

Хатми Қуръон қилиш суннат амалдир. Ҳар бир мусулмон Қуръонни хатм қила олиш билимига эга бўлиши шарт. Уламоларимиз айтадиларки, мусулмон киши Қуръонни узоғи билан қирқ кунда ёки бир ойда бир марта хатм қилиши керак, хатм муддати бундан ўтиб кетса, макруҳ иш қилган бўлади, макруҳ амалнинг гуноҳи бўйнига тушади.

 Валлоҳу аълам!