Ассалому алайкум! Менга ижтимоий тармоқдан бир нарса келган эди. Шунга ойдинлик киритиб берсангиз. » Ҳақиқий рўза танбаллик ёки кун бўйи ухлаш ёки тун бўйи телевизор қаршисида бедор бўлиб чиқиш, дегани эмас. Ёки эрталаб ишга дангаса ҳолда бориш, дегани ҳам эмас. Ёки тажанг, сиқилиш ва одамлар билан кескин муомалада бўлиш, дегани ҳам эмас. Аллоҳ бу каби рўзадан беҳожатдир. Аллоҳ ундай рўзани эгасига қайтиб беради ва ундан рўзани қабул этмайди. Рўзадорни оч бўлмоғи ва чанқагани қолади холос!
Доктор Мустафо Маҳмуд.» Шу ҳадисми? Аллох илмингизги зиёда килсин!
«Билимсизликнинг шифоси» ҳайъати:
Ва алайкум ассалом! Мустафо Маҳмуд деб муаллиф исми ёзилибдику. Ҳадисда телевизор ҳақида ёзилармиди?
Ҳозир кўпчилик мусулмонларда бир одат кенг тарқалган. Рамазон ойига тайёргарлик деганда ишдан таътилга чиқиш, алвон-алвон таомлар истеъмол қилиш, кунни ибодатдан ташқари турли машғулотлар: ухлаш, сериаллар кўриш, улфатчилик қилиш ва турли компьютер ўйинлари билан ўтказиш одат тусига кирди.
Ёки рўзани баҳона қилиб, ишдаги масъулиятдан қочиш, доимий ҳаёт тарзидан узоқлашгани учун тажанг, асабийлашиш, одамларга қўпол муомала қилиш, жанжаллашиш каби ёмон хулқлар ҳам юзага чиқмоқда.
Аслида рўза вақтни қадрига етиш, уни тартибга солиш, ғанимат билиш тушунчаларини тарбиялаш учун машруъ бўлган.
Машруъиятига зид бўлгани учун бундай рўза Аллоҳнинг ҳузурида мардуддир.
Демак, Аллоҳ уни қабул қилмаганидан кейин бундай рўзадан бандага фақат очқагани, сувсагани ва вақтини беҳуда ўтказгани қолади холос.
Бу дегани мутлоқ рўза тутмаган ҳисобида бўлади, дегани эмас, балки тутган рўзаси қусурли, бесавоб бўлади, дегани. Валлоҳу аълам!.
