Ассалому алайкум! Оилада энг кичик фарзандман. Ёшим 23да. Оилалиман, бир фарзандим бор. Опаларимга, онамга ва яқинларимга “намоз ўқинглар, ундай-бундай қилманглар бу гуноҳ” деб насиҳат қилсам, ёқмайди. Замондан ортда қолиб кeтганликда, эскичаликда айблашади. Яқинда онам юзларини пластик опeрация қилдирдилар. Буни қанчалар оғир гуноҳ эканлигини айтсам ҳам барибир ўз билганларидан қолмадилар, ҳатто мeндан ранжидилар. Уларни қандай қилиб тўғри йўлга бошлаш мумкин?
Одинахон Муҳаммад Юсуф:
Ва алайкум ассалом! Сиз Аллоҳ таолодан мадад сўраган ҳолда аҳлингиз ва яқинларингизни яхшиликка, Аллоҳнинг динини маҳкам ушлашга чақираверинг. Уларнинг бўйин товлашидан, сизни ранжитишларидан тушкунликка тушманг. Аллоҳ таоло Тоҳа сурасининг 132-оятида марҳамат қилиб:
وَأْمُرْ أَهْلَكَ بِالصَّلَاةِ وَاصْطَبِرْ عَلَيْهَا
«Аҳлингни намозга амр эт ва ўзинг унга сабр қил», дейди.
Демак, биз яқинларимизни намозга буюришимиз ва бу ишда давом этишимиз ҳамда сабрли бўлишимиз керак. Намозга бошқа амалларни ҳам қиёс қилинади. Сиз уларни динга амал қилишга чорлайверишингиз керак.Бу иш билан мислсиз ажру савобга эга бўласиз. Шу билан бирга ўз вазифангизни адо этган бўласиз. Уларнинг ҳидоятланиши эса, Аллоҳ таолога ҳавола. Аллоҳ барчаларини ҳидоятга бошласин. Асосий нарса, сиз улар учун ҳамиша гўзал ўрнак бўлишингиз зарур. Валлоҳу аълам!.
