Ассалому алайкум! Мен ҳаётимда муаммоларга дуч келаман. Муаммоларнинг кўплари арзимаган нарсалар, лекин мен ҳаммасини кўнглимга яқин олиб, ўйлайвераман. Охири касал ҳам бўлиб қолдим. Яқинларим "олдинлари бундай эмас эдинг", дейдилар. Баъзида ўзим ҳам бундай бўлиб қолганимдан ҳайрон бўламан. Бундай ҳолатларда мен нима қилишим керак?
– Ва алайкум ассалом! Инсон борки, турли муаммоси бор. Ҳаётимиз муаммолардан иборат эканлиги ва Яратган инсониятга бу муаммоларни ечимини топиш учун ақл-идрок, ирода, сабр каби сифатларни берганини доимо ўзингизга эслатиб туринг. Инсон муаммоларини ҳал этар экан бир поғона юқорига чиқиб, маънавий жиҳатдан ўсиб улғая боради. Бироқ инсон бу ишларга лаёқатли бўлиши учун ўзида куч, ғайрат топиши керак. Бунинг учун ҳар бир инсоннинг ўзи жавобгардир. Бир қанча қадамларни босиб ўтишингиз орқали муаммоларни ҳал қилишингиз мумкин. Булар қуйидагилар:
1) Муаммони ҳаёлингизда енгиллаштиринг. Ўзингиздаги ортиқча ҳовлиқишни ва ташвишланишни йўқ қилишга ҳаракат қилинг.
2) Ўзингизга мадорингиздан ортиқча ишларни юклаб олмаслигингиз керак. Негаки ҳар бир охирига етказилмаган иш сизда стресс ҳолатини келтириб чиқаради. Булар бир-бирининг устига йиғилиб бориб охири бирон касаллик келтириб чиқариши мумкин.
3) Бахт ҳиссини сизга биров инъом қила олмайди. Бу ҳис сизнинг ичингиздан келиб чиқади. Бахт ҳисси қўлга олиб кўрадиган бирон нарса ҳам эмаски уни олиб жойлаб қўйсангиз. Биргина вазият турли инсонларга ҳар хил таъсир этади. Унинг дунёқарашидан келиб чиқиб таъсир этади. Демак сиз ҳам атроф-муҳитга бўлган қарашларингизни ўзгартиришингиз керак. Ҳаётдан завқ-шавқ олиб яшаш бу муаммонинг борлигида уни бартараф этиш ҳаракатида бўлиб шу вақтнинг ўзида ўз устингизда ишлашдир.
4) Ўзига маслакдош бўлган инсонлар билан тез-тез муносабатда бўлиб туриш керак. Чунки айнан сизни тушунган кишилар билан гаплашганингизда тўғри йўлда эканлигингизга амин бўлиб турасиз. Бу эса инсоннинг ўзига бўлган баҳосини ошириб беришга сабабдир.
Албатта бу ишларни бажариш учун сизда куч-қувват бўлиши керак. Шунинг учун тўғри овқатланишингизга, вақтида ухлашга ётиб, 8 соатлик уйқудан сўнг вақтлироқ уйғонишга, пиёда юришга, салбий таъсир қилувчи киноларни кўрмасликка, хабарларни эшитмасликка ҳаракат қилишингиз керак. Истеъмол қилаётган овқатингизнинг пишгани 25% ни, хоми 75% бўлишига интилишингиз керак. Масалан ярим коса овқат билан бир коса салат. Овқатларингизга ҳам эътибор қилишингиз керак. Дуккакликларни тез-тез истеъмол қилиш керак. Валлоҳу аълам!
