Ассалому алайкум! Мен 4 фарзанднинг онасиман. Мен ва фарзандларим эримнинг феълидан жуда кўп ранжиб қоламиз. Эрим фермер, 2 ўғлим ҳам дадаси билан бирга меҳнат қилади. Оиладаги пул фақат эрим томонидан сарҳисоб қилинади. Шу боис бирор камчиликлар учун пул сўрасак ёки белгиланган миқдордан бир оз кўпроқ ҳаражат қилсак бизни жуда қаттиқ койиб берадилар. 2 ўғлим ҳам дадасини ёнида тинмай меҳнат қилади, лекин пул сўрашга юраклари безиллайди. Эрим пул мавзусига келганда ҳасис инсонга айланадилар. Эҳсон қилмайдилар, моллари нисобга етган бўлсада, закот бермайдилар. Мен шундай амалларни қилишингиз керак десам, мени койиб берадилар. Мен бу зиқналик туфайли бир кулфат келишидан жуда қаттиқ қўрқаман. Бу вазиятда мен қандай йўл тутай? Қандай маслаҳат берасиз?
– Ва алайкум ассалом! Бундай вазиятларда тақводор инсонлар ҳаётида бўлган воқеаларни, ривоятларни гапириб берган бўлиб, мисоллар келтириб туриш керак. Айнан сиз шундай бўлишингиз керак демасдан шунчаки суҳбатлашиб ўтирган бўлиб гапириб беринг. Ҳадисларга мувофиқ турмуш ўртоғингиз сизга ва оила аъзоларингизга пул бераётганини, совға-саломлар қилаётганини, қўли очиқ эканини ҳаёлан тасаввур қилиб чиройли, яхши гумонда бўлинг. Сизнинг бу қилаётган яхши амалларингиз, ҳадисга мувофиқ иш қилаётганингиз учун ҳам иншааллоҳ бу тасаввурлар ҳақиқатга айланиб кетади, иншааллоҳ. Турмуш ўртоғингиз сизга ёки фарзандларингизни нимаики берса ҳам бунинг учун уни мақтаб қўйишга ошиқиб туринг. Чунки эркак киши яна мақтов эшитиш учун мана шу амални қайт-қайта қилаверишга ҳаракат қилади. Валлоҳу аълам!
