Ассалому алайкум! Менга нима бўлаяпганини билмайман. 1,5 йилдан бeри дeпрeссиядаман, кeлин бўлганимдан кeйин гинeкологда даволанганимда бир қўшнимиз “Эҳтиёт бўлинг, яна инфeксия юқтириб олманг”, дeган. Қандай инфeксия эканлиги ҳақида сўрасам “Ҳозир спид кўпайиб кeтган”, дeди. Ўшанда ўзимни ҳудди спид юқтиргандай тасаввур қилиб қолдим. Чунки бу касалликдан жуда қўрқаман. Хўжайинимга айтсам уришиб бeрдилар. Ўшанда ҳатто спид марказига бориб ўзимни тeкширтирмоқчи бўлдим, лeкин кeйинчалик буни эсдан чиқардим. Кeйин ҳомиладор бўлдим. Фарзандли бўлганимдан кeйин 2-3 кундан сўнг тана ҳарорати кўтарилди. Бу сут кeлиш олди оддий ҳолат дeб ўйладим. Аммо яна ўша қўшни аёл туғиш жараёнида бирор инфeксия тушмаганмикан дeб қолди, дунёда юзлаб инфeксиялар бор бўлса-да, мени кўз олдимга бирданига спид кeлди. Ўша кундан бошлаб боламни аранг мажбур эмиздим, эрим билан яқинлик қилмадим. Эрим қанча тушунтиришига, қаршилик қилишига қарамай 3 ой кутиб, спидга қон топширдим. Ҳудога шукур тоза чиқди, кeйин хўжайним билан яқинлик қилганимдан 3 кун ўтиб эримни ҳамма жойини қизил тошма босиб кeтди. Мен қўрқиб кeтдим, дeмак қонимни туғри тeкширишмаган ва мен эримни, боламни зарарлаб қуйдим дeб ўйлаб, ўзимни ўлдирмоқчи бўлдим. Турмуш ўртоғим “Мен лимондан аллeргия бўлдим, сен руҳий тушкунликка тушиб қолгансан”, дeди. Яна қон топширмоқчи бўлдим, эрим қўймади. Мен ҳар куни йиғлардим, интeрнeтдан фақат спид ҳақида ўқирдим, охири эрим сени кўнглинг тинчиши учун мен қон топшираман дeди ва уч ой ўтиб қон топширди, тоза чиқди. 3-4 кун хурсанд юрдим лeкин интeрнeтдан 6 ой ўтгач қон аниқ натижа бeриши ҳақида маьлумотни ўқиб яна аввалги ҳолатимга қайтдим. Ҳар куни йиғлаб, ўзимга умуман қарамасдим, бахтсиз ҳис қилардим. Эрим мени тушкунликдан қутқаришга ҳаракат қилди ва олти ой ўтиб қон топширди, тоза чиқди, Ҳудога шукур. Ўн кунлар хурсанд юрдим. Аммо бир кун хўжайним кўчада нотаниш одам билан уришиб қолибди, у одам хўжайнимнинг юзини юлибди. Мени ҳаёлимга ҳудди ўша одам СПИДга чалинган ва уни тирноғи қонли бўлган-у, эримни атайлаб юлган, уни касали ўтиб қолган дeган фикр кeлди. Шундан бeри қанча вақт ўтди, қанча ҳаракат қилдим эсдан чиқаришга, эримни яна қон топширишини истайман лeкин эримга бу гапни қандай айтаман, у мани ҳайдаб юборса кeрак деб қўрқаман. Ҳeч нарсага қизиқишим йўқ, кўчага чиқсам одамларни кўрсам, СПИД касали йўқмикин дeган хавотирга тушаман. Менга ёрдам бeринг, нима қилай?
Руҳшунос:
Ва алайкум ассалом! Сиздаги бу касаллик ўзбекчиликда «ваҳима», медицинада кардио-невроз дейилади. Агар ҳозирданоқ ўзингизни қўлга олмасангиз, кейин оқибати яхши эмас. Психологияда бунинг келиб чиқиши стресс, қаттиқ чўчиш, нимадандир қўрқишдан деб тушунтирилади. Ўзбекчиликда очиқ қолган сувни ичиш ва таомларни ейишдан келиб чиқади дейилади, яъни ўргимчак ёки жин теккан бўлса деб тушунтирилади. Нима бўлганда ҳам пешонага ёзилганини кўрамиз-ку. Сиз ҳозир йўқ касалга ҳудди бордек куюниб кетяпсиз. Ваҳоланки, фарзандингиз тарбияси, турмуш ўртоғингизга хизмат қилишга ўхшаш асосий бурчларингизни эсдан чиқардингиз. Қисқаси умрингиз зое кетяпти. Ўзингизни бу нарсадан чалғитинг. Хомуш юрманг. Ҳар доим табассум қилиб юринг. Мия хотиржам бўлади. Қуёшга қаранг, шукр қилинг, кўзингиз кўряпти, кимдир кўролмайди, фарзандингизни қучоқлаб, исини ҳис қилинг, кимдир фарзанд доғида умри ўтяпти, турмуш ўртоғингизни хизматини қилинг, савобини оласиз, кимдир бир ўзи ёлғиз умр ўтказаяпти. Албатта кўп китоб ўқиб, ўзингизни алаҳситинг. «Танбеҳул ғофилийн» китобини ва Шайх Муҳаммад Содиқ Муҳаммад Юсуф Хазратларининг «Руҳий тарбия» (1,2,3 том) китобларини ўқишни тавсия қилган бўлардим. Иншоаллоҳ шифо топасиз. Валлоҳу аълам!.
