Ассалому алайкум ва роҳматуллоҳи ва барокатуҳ. Одинахон Устоз саломатмисиз? Сизни қаттиқ хурмат қиламан ва ўзим, фарзандларим ҳам сиз каби илмли бўлишлигимизни ният қиламан. Сиз билан кўришиб, дилдан суҳбатлашиш менинг энг катта орзуларимдан бири! Саволим: катта фарзандим 3 ёшдан ўтди. Унга қурон ўргатмоқчиман ва шуни ҳаракатидамиз Алҳамдулиллаҳ, лекин жуда ҳам кўп касал бўлади, шамоллаш, истима, йўтал такрор- такрор қийнаябди. Қуроннинг ўзи шифо, лекин 7 та шифо оятлари бор деб эшитгандим. Агар мумкин бўлса, шу оятлар ҳақида маълумот берсангиз.
– Ва алайкум ассалом!
Qur’oni karimdagi mashhur shifo oyatlari
1.
وَيَشْفِ صُدُورَ قَوْمٍ مُّؤْمِنِينَ
(Alloh) mo‘’minlar jamoasining ko‘ngillariga shifo (huzur-halovat) bergay (Tavba surasi, 14-oyat).
2.
يَا أَيُّهَا النَّاسُ قَدْ جَاءتْكُم مَّوْعِظَةٌ مِّن رَّبِّكُمْ
وَشِفَاء لِّمَا فِي الصُّدُورِ وَهُدًى وَرَحْمَةٌ لِّلْمُؤْمِنِينَ
Ey insonlar! Rabbingizdan sizlarga bir nasihat, dillardagi narsalarga (yomon tuyg‘ular, shahvat, botil aqida, dard va qiynoqlarga) shifo hamda mo‘’minlarga (to‘g‘ri yo‘lni ko‘rsatuvchi) hidoyat va rahmat (bo‘lgan Qur’on) keldi (Yunus surasi, 57-oyat).
3.
يَخْرُجُ مِن بُطُونِهَا شَرَابٌ مُّخْتَلِفٌ أَلْوَانُهُ فِيهِ
شِفَاء لِلنَّاسِ إِنَّ فِي ذَلِكَ لآيَةً لِّقَوْمٍ يَتَفَكَّرُونَ
Ularning (asalarilarning) qorinlaridan rango-rang bir ichimlik (asal sharbati) chiqadiki, u insonlar uchun shifo (manba’i)dir. Albatta, bunda tafakkur qiladigan qavm uchun ibrat (va Allohning qudratiga ishorat) bordir (Nahl surasi, 69-oyat).
IZOH. Arining yoshiga, jinsiga va asal oladigan gul hamda mevalarining ta’miga ko‘ra asalarining qornidan oq, sariq, qoramtir va boshqa rangli asal sharbati chiqadi (Qozi Bayzoviy; Jalolayn). Oyati karimada «shifoun» lafzi nakra (majhul) bo‘lib kelgani uchun «Asal har turli kasallikka shifodir», deyilgan.
4.
وَنُنَزِّلُ مِنَ الْقُرْآنِ مَا هُوَ شِفَاء وَرَحْمَةٌ لِّلْمُؤْمِنِينَ
Biz Qur’ondan mo‘’minlar uchun (ruhiy va badaniy kasalliklariga) shifo va rahmat bo‘ladigan narsalarni nozil qilurmiz (Isro surasi, 82-oyat).
5.
وَإِذَا مَرِضْتُ فَهُوَ يَشْفِينِ
Bemor bo‘lgan vaqtimda menga shifo berguvchi U (Alloh)dir (Shu’aro surasi, 80-oyat).
IZOH. Adab yuzasidan rahmat va yaxshilikni Allohga nisbat berib, dard va yomonlikni inson o‘ziga nasbat berishi – muqaddas Islom dinining eng go‘zal odoblaridandir.
Masalan, Imom Muslim va boshqa ulug‘ muhaddislar keltirgan hadisi sharifda “(Allohim!) Xayr – yaxshilikning hammasi Sening qo‘lingdadir. Yomonlik Senga nisbat berilmas”. deyiladi. (Imom Muslim, “Musofirlar namozi” kitobi, 201-raqam).
Bu oyatda ham hazrati Ibrohim alayhissalom dard va bemorlikni o‘zlariga nisbat berib, albatta, shifoni Allohga izofa qilganlar.
قُلْ هُوَ لِلَّذِينَ آمَنُوا هُدًى وَشِفَاء
(Ey Rasulim! Ularga) ayting: «U (Qur’on) iymon keltirganlar uchun hidoyat (to‘g‘ri yo‘lni ko‘rsatuvchi rahnamo) va shifodir (Fussilat surasi, 44-oyat).
Mirzo KENJABEK
Manba: azon.uz
