– Ва алайкум ассалом! Намоз ўқиётган пайтда хаёл бузилиши ёки ёдига бирор нарсалар тушиши намозни бузмайди. Валлоҳу аълам.
Утба розияллоҳу анҳудан ривоят қилинади:
«Набий соллаллоҳу алайҳи васаллам билан аср намозини ўқидим. У зот салом беришлари билан шошилиб туриб, хотинларидан бирининг олдиларига кирдилар. Сўнгра қайтиб чиқдилар ва шошилганларига қавмнинг юзида таажжуб кўриб:
«Намозда туриб, ҳузуримиздаги ёмби тиллони эслаб қолдим. Унинг бизнинг ҳузуримизда тунаб қолишини хуш кўрмадим. Бас, унинг тақсимлаб юборилишини амр қилдим», дедилар».
Шарҳ: Ушбу ҳадисдан олинадиган фойдалар:
1. Набий соллаллоҳу алайҳи васалламнинг дунё ҳою ҳавасига қизиқма-ганликлари ва у зот соллаллоҳу алайҳи васалламнинг хайр-садақага қизиқишлари.
2. Намозда хайр-садақа, тақво амали ҳақида эслаш мумкинлиги.
3. Кишилар таажжубланган ишларни баён қилиб, уларни таажжубдан чиқариш, ҳақиқатни баён қилиб бериш кераклиги.
وَقَالَ عُمَرُ: إِنِّي لَأُجَهِّزُ جَيْشِي وَأَنَا فِي الصَّلَاةِ. رَوَاهُمَا الْبُخَارِيُّ.
«Умар:
«Албатта, мен намозда турган ҳолимда ўз аскарларимни ҳозирлай-ман», деди».
Икковини Бухорий ривоят қилган.
Шарҳ: Демак, ҳазрати Умар розияллоҳу анҳу намоз ўқиётиб, Ислом лашкарини қандай тартибга келтириш, бошлиқлар тайёрлаш ва бошқа шунга ўхшаш жиҳодга ҳозирланишга оид ишларни ўйлаган вақтлари бўлган экан.
Бу ҳам иймон, дин-диёнат тараққиёти ҳақида фикр қилиш билан намоз бузилмаслигига далилдир.
Бошқа хаёллардан эса узоқда бўлиш ҳар бир намозхон учун лозимдир.
Валлоҳу аълам!
