Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Булғорда «Мусулмон тафаккури: миллий, ҳудудий ва тамаддун ўлчовлари» номли халқаро илмий-амалий конференция бўлиб ўтди. Мазкур тадбир «Татар художўйлари» йили доирасида ташкил этилган бўлиб, «Россия исломий дунё» стратегик гуруҳи тадбирлари режасининг амалга оширилиши ҳамдир.   Мазкур форум Татаристон Республикаси  мусулмонлар диний форуми ҳамда «Ислом маданияти, таълими ва илмни қўллаб-қувватлаш» нотижорий хайрия фонди  ҳамкорлигида ташкил этилган.

Конференцияда Россия, Туркия, Миср, Сурия, Ироқ, Тожикистон ва Қозоғистондан Ислом уламолари, илмий ва экспертлар уюшмаси аъзолари иштирок этишмоқда.

Конференция арафасида Булғор Оқ масжиди қошида тантанали равишда «Қуръонни чуқурлаштирилган ҳолда ўрганиш» нинг олти ойлик курсларининг очилиш маросими бўлиб ўтди.

Халқаро илмий-амалий конференциянинг ўтказилиши ва курсларнинг очилиши, аслида, Булғор исломий академияси ўз фаолиятини бошлаганлигининг белгисидир.

Форумнинг очилиш маросимида Татаристон Республикаси Давлат маслаҳатчиси Минтермир Шаймиев иштирок этди. «Билим ва таълим Исломда ҳамиша алоҳида аҳамиятга эга бўлган», деб таъкидлади у ўзининг маърузасида.

«Илм – бу, Исломнинг руҳи ва диннинг таянчидир», – деб Пайғамбар Муҳаммад соллаллоҳу алайҳи васалламнинг ҳадисларидан иқтибос келтирди Минтемир Шаймиев.  «Булғорлар, Пайғамбар суннатларига амал қилган ҳолда, – таъкидлади у, – илмга муҳаббатли бўлишган ва ҳамиша янги билимларни эгаллашга интилишган».

«Маълумки, 1080 йилдаёқ булғор олими Ёқуб ибн Нўъмон томонидан билимлар уйи, замонавий тил билан айтилганда университет очилганди. У энг шимолий Исломий давлатнинг шунчаки ўқув маркази эмас, балки халқаро миқёсга ҳам эришди. Булғор давлати  ўша пайтда талаб кучли бўлган ҳанафий мактаблари, фикҳи ва ҳуқуқининг марказига айланган эди», – деб эслатди Татаристон Республикаси Давлат маслаҳатчиси.

Шаймиев таъкидладики, мусулмон диний марказининг қайта ташкил этилиши – Булғор исломий академиясининг очилиши – нафақат Россияда, балки ундан ташқарида ҳам катта аҳамиятга эга.

«Ҳозирги пайтда мусулмон дунёси ва жаҳон ҳамжамияти  мисли кўрилмаган даражадаги терроризм билан тўқнаш келмоқда, у Ислом либосини кийиб, Ислом тимсоллари ва таълимини кўрсатишга ҳаракат қилмоқда. Мамлакатимиз президенти Владимир Путин айтганларидек, бу террористлар ўзларининг қонли жиноятлари билан буюк дин бўлмиш Исломни бузиб кўрсатишмоқда. Бу ёмонликларни фақатгина  ҳақиқий илмга асосланган яхши сўз, тўғри дунёқараш, асл билим билан ютиш мумкин», – деб таъкидлади Минтермир Шаймиев.

«Булғор исломий академияси ўз эшикларини илмни яхши кўрадиган, унга интиладиган, мазкур илмларни республика мусулмонлари ва Россия жамоатчилиги фойдасига сарфлашни кўзлаган барча учун очиқ. Умид қиламанки, мазкур марказ исломий анаъаналрнинг давомчиси бўлиб қолади», – деди давлат маслаҳатчиси.

Очилиш маросимида иштирок этган Камиль ҳазрат Самигуллин мазкур академия нафақат Россия, балки МДҲ мамлакатларини ҳам диний мутахассислар билан таъминлашига умид боғлашини айтиб ўтди.

Ирода  таржимаси