Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

«Халқаро саломатлик куни» 1948 йилдан буён Бутунжаҳон Соғлиқни Сақлаш Ташкилоти ташкил топган кун 7 апрелда нишонланади. Шу муносабат билан ушбу ташкилот бутун дунёда соғлиқни сақлаш борасидаги энг долзарб муаммони танлайди ва шу куни муаммо юзасидан таҳлил ишларини олиб боради. 2013 йил 7 апрель «Халқаро саломатлик куни» гипертония, яъни қон босимининг кўтарилишига бағишланди.

Ҳозирги кунда артериал гипертония дунё аҳолиси ўртасида жуда кенг тарқалган бўлиб, агар бемор бу касалликдан яхши даволанмаса, у юрак ҳуружи, инсульт (фалаж), қандли диабет каби асоратларга олиб келиши мумкин. Бугунги кунга келиб катта ёшлилар орасида ҳар уч кишидан бир киши қон босими билан оғриган беморлар ҳисобланади ва бу касалликнинг ёшдаги пропорцияси ҳам ошиб бормоқда: 20 ва 39 ёшлилар орасида 10% ни, 50 ва 59 ёшлилар орасида эса 50% ни ташкил қилаяпти. Баъзи ривожланган давлатларда касалликнинг олдини олиш ва уни самарали даволаш бўйича олиб борилаётган чора-тадбирлар шуни кўрсатдики, қуйидагиларга амал қилиш гипертония асоратларини камайтириши мумкин экан: • Истеъмолда тузни камайтириш; • Тўғри овқатланиш; • Алкогол ичимликларни ичмаслик; • Давомий жисмоний ҳаракат билан шуғулланиш; • Вазн мувозанатини сақлаб туриш; • Тамаки маҳсулотларини истеъмол қилмаслик каби.