Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Силаи раҳм эгаси
“Ва албатта, сен улкан хулқдасан” (Қалам сураси, 4-оят). Расулуллоҳ соллаллоҳу алайҳи васалламнинг улкан хулқ эгаси эканликларини Аллоҳ таоло юқоридаги ояти карима орқали таъкидлаган. Дунёда қандайин яхши хулқ бўлмасин, уларнинг бари Расулуллоҳ соллаллоҳу алайҳи васалламда жам эди. У зот дунёнинг барча синовларини чиройли сабр билан енгиб ўтиб, баъзан қоринларини тўйғиза олмай, рўза тутиб юрган кунлари ҳам Аллоҳнинг тақдирига рози бўлдилар. Инсонларнинг энг меҳр-мурувватлиси ҳам яна у зот алайҳиссалом эдилар. Етимларнинг бошини силаб, камбағалу бечораларга, беморларга силаи раҳм кўрсатиш, ҳатто золимларнинг зуғумларига ҳам яхшилик билан жавоб қайтариш фақатгина энг гўзал қалб эгасига хосдир. Ҳатто ҳазил учун ҳам ёлғонни тилига олмаган, устларидаги сўнгги кийимини ҳам биродарига совға қилиб юборолган, қўшниси оч бўлгандан кўра ўзи оч ухлашни афзал кўрган, болалар, ожизлар, етимлар ва аҳли аёлларига энг яхши муносабатда бўлган, холис Аллоҳ учун жонидан, молидан кечишга тайёр инсон, албатта, суюкли Пайғамбаримиз Муҳаммад соллаллоҳу алайҳи васалламдир! Аллоҳ таолога ҳамд, суюкли Пайғамбаримиз Муҳаммад Мустафо соллаллоҳу алайҳи васалламга беҳисоб салому салавотлар бўлсин!
Лазокат Фозилова
