Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ҳақиқатдан ким тонар?
Ажаб дунё, ажаб хилқат,
Ўз-ўзича бўлмаган.
Еттиқат еру самовот,
Бежиз яратилмаган
Моддиюнчи ким ўзи у?
Ҳақиқатдан ким тонар?
Боши тошга урилса-ку,
Аллоҳ керак бўб қолар.
Бекорчи гап тил оғритар,
Шаҳодат айт, биродар,
Малакул мавт келар чоғда
Иймон керак бўб қолар.
Эскичамас Қуръон-қомус,
Дарс биз кўзи сўқирга
Бекорчимиз, аммо вақт йўқ
Қўлга олиб ўқирга.
Жон ширин –ширин ҳаёт,
Аллоҳ синов, дард берар.
Шифо излаб охир «Нажот» –
Қуръон керак бўб қолар.
Айтишсалар таниймиз-у
Кибор казо-казони.
Аммо яхши танимаймиз
Барҳақ Расулуллоҳни.
Унутманглар фақат шуни:
Ёлғизлик қийин бўлар.
Ҳисоб – китоб бўлар куни
Сарбон керак бўб қолар.
