Ассалому алайкум! Турмуш ўртоғим кўп йиллардан буён четда ишлайдилар. Фарзандларимни ўзим тарбиялаб келмоқдаман. Қизларимни турмушга бериб орқасидан раҳмат эшитяпман. Ҳозир ўғлим ўспирин. Турмуш ўртоғим билан кўп хафалашиб қоляпмиз. "Ҳамма вақтингни ўғлимга ва менга ажратишинг керак, лекин сен фақат намоз ўқиш, Қуръон ўқишга сарфлайсан. Билиб қўйгинки мени норози қилсанг ўқиган намозинг ҳам бир пул" дейдилар. "Намозларингни кечқурун битта қилиб ўқийсан, эрни рози қилсангина намозинг қабул бўлади" дейдилар. Аллоҳ намозларни вақтида ўқишликни фарз қилганку қандай қилиб эримни рози қиламан деб намозларимни кечиктириб ўқийман ахир! Намозларимда эримга инсоф сўраяпман холос, лекин “норозиман сендан” деган гаплари кўнглимни хира қиляпти.
– Ва алайкум ассалом!
Ҳасандан ривоят қилинади:
“Расулуллоҳ соллаллоҳу алайҳи васаллам: “Холиқнинг маъсиятида махлуққа итоат йўқ» – дедилар”. Ибн Абу Шайба ривоят қилган. (Муттафақун алайҳ)
Яъни, бандани рози қиламан деб, Аллоҳ таолони норози қиладиган нарсани қилиб бўлмайди.
«لا طاعة لمخلوق في معصية الخالق»
Расулуллоҳ соллаллоҳу алайҳи васаллам ҳадиси муборакларида : “Аллоҳга осий бўладиган ўринларда махлуққа итоат қилинмайди” деганлар.
Валлоҳу аълам!
