Ассалому алайкум! Хурматли муслимаат.уз ҳаяти аъзолари ва опамиз устозимиз Одинахон опа. Саволим шундан иборатки, бундан анча вақт олдин уйдагиларим мени бир йигитга унаштирдилар. Яқинда тўй бўлиши керак, у йигит энди ҳижоб ўрайсан туй кунидан бошлаб ҳижобда бўласан деди. У кишига розилик беришдан олдин қаршилик қилдим чунки аввалро келишганимиз тўйдан кейин бошқа мамлакатга бориб яшашимиз керак эди, шу пайти ўрашга келишиб олгандик. Эрталаб туриб онамга шунақа деб айтгандим онам қатъий норозилик билдирдилар ҳаттоки қайтарсин тўйни майли дедилар. Кейин билсам дадам, онам, у кишининг ота-онаси ҳам қарши экан. Онам ҳижоб ўрамоқчи бўлсанг тўйингда қатнашмайман ҳам, деган гапларни гапирди. Нима йўл тутишни билмаяпман, ота-онам дуосини олиш учун ҳижоб ўрамай кейинроқ ўрашим керак. Аммо йигит шу нарсага кўнмай тўй қайтармоқчи бўлса, қайта қолсин дедилар. У киши ёмон эмаслар, аммо ҳаёлимда мен билан бирга бўладими бошқа биланми у кишига фарқи йўқ, нима қилай, манга маслаҳат беринглар.
– Ва алайкум ассалом! Авратни сатр қилиш Аллоҳнинг буйруғи эканини биласизми? Қандай қилиб Аллоҳнинг буйруғига қарши чиққан ота онангизнинг дуосини оласиз? Ота онангизни яратган, уларга фарзанд неъматини берган Аллоҳ эмасми? Улар шундай Зотга қарши чиқа туриб қилишган дуолари нимага ярайди? Қолаверса, нима учун эрга тегяпсиз? Эр кимлигини, никоҳдан мақсад нима эканлигини биласизми? Эрингизга танингиз маҳрам бўлади, у сочларингизга, гўзалликларигизга қараб баҳра олиш учун, сиздан ҳузурланиш учун сизга уйланяпти. Қандай қилиб баҳра оладиган, ҳузурланадиган аёлининг жисмини бошқа эркакларга кўрсатиб қўя олади? Буни катталар тушунишса бўлмайдими, ахир оила қуришганку? Сизчи, сочларингиз, бўйниларингиз, қоматингизни кўриб, бегона эркаклар сизни хаёл қилишларига йўл қўйиб берасизми? Мана шу сатрланишнинг ҳикмати, бунга бошқаларнинг розилиги, дуоси ёки чет элга кетишнинг мутлақо алоқаси йўқ! Валлоҳу аълам!
