Ассалому алайкум устоз,келинимни учта ўғли бор,учаласини хам кесарча кесиш йўли билан дунёга келтирган,учинчи фарзандида шифокорлар ўзини розилигисиз ИЖК қилиб кўйган экан,келиним қиз фарзанд кўрмоқчи,шариат қоидалари бўйича ЭКО қилдириш мумкинлигини ўқиганмиз,келиним мутахассис шифокорлар билан гаплашса хозир тиббиёт ривожланиб уруғни қиз ёки ўғиллигини олдиндан текшириб билиб хохлаганингизни қўйиб бераркан,устоз сизга саволим,шу ЭКО қилдиришда қиз бола қўйиб беринг деб жинсини олдиндан танлаб қўйдириш жоизми,жавобингиз учун олдиндан рахмат.
– Ва алайкум ассалом! Ўғил ёки фарзанд кўриш фақат Аллоҳнинг Ўзигагина боғлиқ. Ким нима қилса ҳам Аллоҳнинг тақдирида ёзгани бўлади. Танлов ниҳоятда оз, ёки ўғил ёки қиз бўлгани учун таҳминан гапирганларнинг гапи тўғри келиб қолиши бор. Шариатимизда ҳаром бўлмаган сабабларни қилишдан динимиз ман қилмайди. ЭКО масаласида ҳам айнан никоҳли эр хотинларни уруғидан фойдаланмаса амалиёт зино бўлади. Бизларга баъзи ишончли одамларни айтишларича ЭКО қилдиришда донарни уруғидан фойдаланиш ҳолатлари ҳам кўп экан. Аллоҳ таоло "Шууро" сурасида марҳамат қилади:
لِلَّهِ مُلْكُ السَّمَاوَاتِ وَالْأَرْضِ يَخْلُقُ مَا يَشَاء يَهَبُ لِمَنْ يَشَاء إِنَاثًا وَيَهَبُ لِمَن يَشَاء الذُّكُورَ أَوْ يُزَوِّجُهُمْ ذُكْرَانًا وَإِنَاثًا وَيَجْعَلُ مَن يَشَاء عَقِيمًا إِنَّهُ عَلِيمٌ قَدِيرٌ
49. Осмонлару ернинг подшоҳлиги Аллоҳникидир. У Зот хоҳлаган нарсасини яратур. У Зот хоҳлаган кишисига қизлар ҳадя этур ва хоҳлаган кишисига ўғиллар ҳадя этур.
50. Ёки уларни жуфтлаб – ўғил-қиз қилиб берур ва хоҳлаган кишисини туғмас қилур. Албатта, У ўта билувчидир, ўта қудратлидир.
Инсонга ҳамма нарсани фақат Аллоҳ таоло беришининг ёрқин намунаси фарзанд масаласида кўринади. Айни шу масалада инсон ўзининг ожизлигини хис этади. Ўз хоҳишига кўра бирон нарсани бор қила олмаслигини, балки доимо Аллоҳ таолонинг мадади ва иноятига муҳтож бўлиб туришини англаб етади.
«Осмонлару ернинг подшоҳлиги Аллоҳникидир».
Осмонларда ва ерда нимаики бўлса, ҳамма-ҳаммаси Аллоҳ таолонинг мулкидир.
«У Зот хоҳлаган нарсасини яратур».
Бу ишда У Зотнинг хоҳишига ҳеч ким тўсиқ бўла олмайди. Бутун борлиқнинг Молики – эгаси ва мутлақ Холиқи бўлган ўша Зот Ўз мулкидан хоҳлаган бандасига хоҳлаган нарсасини беради. Жумладан, фарзанд бериш масаласида ҳам
«У Зот хоҳлаган кишисига қизлар ҳадя этур».
Агар ўғил ё қиз фарзанд кўриш ота-она хоҳишига кўра бўлганида, ушбу оятлар нозил бўлаётган пайтдаги жоҳилий арабларда қиз фарзанд бўлмас эди. Чунки улар қиз фарзандни ёқтиришмасди. Ҳатто қизларини тириклай кўмиб ҳам ташлашарди. Ҳолбуки, баъзилар фақат қиз фарзандлар кўришади, ўғил фарзандга зор бўлиб юришади. Бу ҳол фарзанд фақат Аллоҳнинг хоҳиши билан ўғил ёки қиз бўлишини билдиради.
«...ва хоҳлаган кишисига ўғиллар ҳадя этур».
Фақат ўғил фарзандлар кўриб, Аллоҳдан қиз сўраб юрган одамлар ҳам оз эмас.
«Ёки уларни жуфтлаб – ўғил-қиз қилиб берур…»
Аралаш фарзандлар кўриш одамлар ичида кўп тарқалган ҳолатдир.
«...ва хоҳлаган кишисини туғмас қилур».
Бундайлар озчилик бўлиб, Аллоҳ таоло ибрат учун, фарзанд одамларнинг хоҳиши билан эмас, Аллоҳнинг хоҳиши билан бўлишини кўрсатиш учун шундай қилиб қўйган.
«Албатта, У ўта билувчидир, ўта қудратлидир».
Албатта, Аллоҳ ўта билувчи ва ўта қодир Зотдир.
Ҳамма нарсани билиб қилади. Жумладан, кимга қиз, кимга ўғил, кимга ўғил-қиз беришни ёки кимни туғмас қилишни ҳам Ўзи билади. Бу ишларга Унинг қудрати етади. ("Тафсири Ҳилол" китобидан). Валлоҳу аълам!
