Ассалому алайкум. Мени томоқ оғриғи тез-тез безовта қилади. Совуқ сув ичмайман, муздай егулик емайман, аммо чўмилганимдан кейин кўпинча томоғим оғриб қолади. Бу вазиятда қандай воситаларни тавсия қиласиз?
Ва алайкум ассалом. Томоқ оғришининг тез-тез қайталаниши иммунитетингиз сустлигидан ёки бурун атрофидаги синусларда сурункали яллиғланиш ўчоқлари мавжудлигидан келиб чиқиши мумкин. Энг аввало, мавсумга муносиб кийининг, иммунитетингизни рағбатлантиринг, жисмоний тарбия билан шуғулланинг, кузги мавсумий мевалар ва сабзавотлар билан организмингизни тўйинтиринг, стресс вазиятлардан ўзингизни узоқроқ тутинг ва хотиржам бўлинг. Булар иммун тизимнинг ишини мувофиқлаштириб турувчи олтин қоидалар. Бизнинг менталитетимизда бирон касалликни даволаш учун албатта дори ичиш шартдек янглиш тушунча шаклланиб қолган. Аслида жуда кўп касалликлар нотўғри турмуш тарзини олиб боришдан ва норационал овқатланишдан келиб чиқади. Шуларни ўрнига қўя олсак, касалликлар келиб чиқиши салмоқли даражада камаяди.
Сизга тавсиям юқоридагиларга риоя қилинг ва ЛОР мутахассиссига кўрининг. Бурунда полип ёки аденоид бўлса ёки бурун тўсиғида қийшиқлик бўлса ҳам томоқ тез-тез оғриши мумкин! Наъматак дамламасини, агар сизда ўт-тош касаллиги ва буйрак-тош касаллиги бўлмаса, асал ва қист ал-ҳиндийни мунтазам истеъмол қилиб юринг.
