Ассалому алайкум! Ассалому алайкум ва роҳматуллоҳи барокатуҳу. Аллоҳ илмингизни зиёда қилсин! Менинг иродам сустлигидан намоз ўқиётган вақтимда шайтон жинсий тарафлама хаёлимни бузади, лекин аҳамият бермай давом эттираман. Намоз ўқишни жуда кеч бошладим, лекин 1-2 ой ўқиб, тўхтатиб қўйяпман, намозимни тўлиқ адо этишни хоҳлайман. Тўлиқ ўрганишимга ёрдам керак. Қандай йўл тутсам бўлади?
«Билимсизликнинг шифоси» ҳайъати:
Ва алайкум ассалом! Бу бир синов, ин шаа Аллоҳ бундан ўтиб оласиз. Аввало дуо қилиб Аллоҳ таолодан астойдил сўранг, Ўзи мадад берсин, Ўзи қўллаб-қувватласин. Намоздан аввал яхшилаб дуолар билан таҳорат олинг. Таҳорат олётганингизда Аллоҳ таоло сизни кўриб турганини ҳис қилишга ҳаракат қилинг. Намозга ҳам ўзингизга дам солиб, дуо қилиб киришинг. Ҳар хил хаёллар келганида «Аъузу» ни айтинг.
Бошқа пайтларда намозга алоқадор китобларни ўқинг, маърузаларни тингланг. Шу билан бирга ўзингизга беш маҳал намоз пайтида шерик бўладиган одамни топинг. Ундан ёрдам сўранг, сизни назорат қилиб кўмаклашиб турсин. Аллоҳ таоло сизга ибодат ҳаловатини татитиб қўйсин, хусусан намозни хушуъ ва хузуъ ила, Ўзи рози бўладиган ҳолда адо этишингизни насиб айласин
