Қандай йўл тутай?

23:42 / 04 апрель | Sarvinoz Urozalieva | 124
Ассалому алайкум! Ёшим 24 да. Бир нафар қиз фарзандим бор. Турмуш ўртоғимнинг характерлари жуда яхши. Мени ҳурмат қиладилар. Аммо оила қурганимиздан буён қайнонам уларни менга қарши қайрайдилар, деб ўйлайман. Биз улар билан бирга яшамаймиз. Аммо телефонда гаплашсалар ҳам ўзгариб қоладилар. Жуда таъсирли гапларидан кейин 3-4 марта қўл кўтардилар. Бир жахллари чиқса тўғриси аямайдилар. Бир неча бора буни кечиришга, хўжайинимга бу яхшиликка олиб келмаслигини тушунтирдим. Лекин бу қайта-қайта такрорланяпти. Мен ўзимни беайбман демоқчимасман. Бошида қайнонамни онамдек кўришга ўзимга ваъда бергандим. Алоҳида бўлиб чиққанимизда ҳам кўп телефон қилиб турардим. Аммо гаплари фақат мени ёмонлаш эди. Мендан кўнгиллари тўлмайди. Ҳозир шу даражага етганки, телефон ҳам қилгим келмайди. Ҳаётимда бир кун келиб кимдандир шу даражада нафратланаман деб ўйламагандим. Мен ортиқ бундай яшай олмайман деб ўйлаяпман. Фарзандим учун чидайми? Бора-бора бунга кўзим етмай қоляпти. Илтимос маслаҳат беринг. Мен нима қилай?
Руҳшунос:

– Ва алайкум ассалом! Қайнона ва келин муносабатлари доим мушкул вазиятларни туғдиради. Аммо бу икки инсондан бири сабр ва донолигини кўрсата билса барча муаммолар яхшиликка, эзгуликка айланади. Қайнонангизни ҳаёлан яхши кўринг. Сиз ҳаёлингизда ҳам уни ёмон кўришингиз сиздан шундай энергияларни таратиб турадики буни у ҳис этади ва ўзи тушунмаган ҳолда сизни ҳам ёмон кўра бошлайди. Бу гўё охири йўқ узилмас айлана шаклидаги муаммолар айланасига ўхшайди. Сиз хафасиз ва қайнонангиз сиздан ҳафа. Чунки бу ерда сиз ҳаёлларингизнинг аксининг маҳсулини кўраяпсиз. Сиз ҳаёлларингизни тўғирлашга ҳаракат қилинг. Ҳаёлларингизда қайнонангизга совғалар улашинг. Уни қаттиқ қучоқланг. Гулларни ҳадя қилинг. Ширинликлар пишириб “сизга илиндим, сизсиз томоғимдан ўтмаяпти” деб кўринг. Гўёки онангизга қандай муомала қилсангиз ана шу муомалаларни қайнонагизга қилинг. Албатта онсон иш эмас. Чунки нафратланиб турган инсон бирдан меҳр-мурувват кўрсатиши мушкул иш. Аммо шу ишни бажара олсангиз ҳаётингизда ҳам қайнона келин ўртангизда секин-секин меҳр кўпая бошлайди ин шаа Аллоҳ. Билингки ҳаммаси ўзингизнинг қўлингизда. Нафратларингизни ҳайдайман, қайнонам менга нисбатан ўзгаради, мени яхши кўради десангиз, бу қилган яхши гумонларингиз эвазига ин шаа Аллоҳ ҳаётингиз ҳам яхши томонга ўзгаради.  Валлоҳу аълам!