Жума муборак бўлсин!
Ўқиш режими + -

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Ассалому алайкум ва раҳматуллоҳи ва барокатуҳ!
Бисмиллаҳир Роҳманир Роҳим!
Барчаларингизга бугунги саййидул аём – Жума куни муборак бўлсин!
Албатта, мўмин-мусулмон учун Аллоҳ таолонинг берган ҳар бир куни азиздир. Бироқ жума куни мусулмонлар учун алоҳида аҳамиятга эга ҳисобланади. Хўш, нега энди айнан жума кунини байрам қиламиз? Нега бу кундаги амаллар ва ибодатлар бошқа кундагига нисбатан афзалроқ? Шулар ҳақида бироз тўхталиб ўтмоқчимиз.
Абу Ҳурайра розияллоҳу анҳудан ривоят қилинади: «Набий соллаллоҳу алайҳи васаллам:«Қуёш чиққан куннинг энг яхшиси жума кунидир. Унда Одам халқ қилинди. Унда у жаннатга киритилди. Унда у жаннатдан чиқарилди. Қиёмат куни ҳам фақатгина жума куни қоим бўлур», дедилар». Бешовларидан фақат Бухорий ривоят қилмаган. Абу Довуд қуйидагиларни зиёда қилган: «Унда унинг тавбаси қабул қилинди. Унда у вафот қилди. Унда қиёмат қоим бўлур. Жума куни ҳамма жониворлар тонг отгандан то қуёш чиққунча (қиёмат) соатини қўрқинч ила кутиб турурлар. Фақат жин ва инс бундан мустасно», дейилган. «Жума» сўзи арабча сўз бўлиб, жамлаш деган маънони англатади. Чунки бу кунда мусулмонлар жамланиб, жума намозини ўқийдилар. Аллоҳ таоло мусулмонлар учун айнан шу кунни ихтиёр қилганига бир неча сабаблар бор. Аввало: «Қуёш чиққан куннинг энг яхшиси жума кунидир». Энди нима учун қуёш чиққан куннинг энг яхшиси жума куни эканини ҳадиси шарифдаги нарсалар ёғдусида ўрганиб чиқайлик: 1. «Унда Одам халқ қилинди». Инсониятнинг асли ҳисобланмиш одам алайҳиссаломни Аллоҳ таоло жума куни яратгандир. Бу у кун қанчалик фазилатли эканини билдиради. Айни шу ҳодисани эслаб туриш учун ҳам жума куни ҳафтанинг байрам кунига айлантирилган. 2. «Унда у жаннатга киритилган». Аллоҳ Одам отани жаннатга киритган кун ҳам жума куни эди. Демак, Одам алайҳиссалом жаннатдан ташқарида яратилганлар. У кишини улуғлаб жаннатга киритилган кунларини биз зурриётлари байрам қилишимиз табиий. Шу боис ҳам жума куни ҳафтанинг байрам куни бўлишга арзийди. 3. «Унда у жаннатдан чиқарилди». Яъни жума кунида Одам алайҳиссалом жаннатдан чиқарилдилар. Бошқа бир ривоятда, ерга туширилди, дейилган. Бу ҳам улуғ неъмат. Чунки Одам алайҳиссалом жаннатда гуноҳ қилиб, иқобга дучор бўлиш даражасига етган эдилар. Аллоҳ таоло эса у кишини мағфират қилиб, ерга Ўз халифаси қилиб туширди. Шунинг учун ҳам Одам алайҳиссаломнинг зурриётлари бу кунни ҳар ҳафта байрам қилишлари лозим. 4. «Қиёмат куни ҳам фақатгина жума куни қоим бўлур». Ана ўшанда мўмин бандалар асосий мақсадларига эришадилар. Роббилари жамолига мушарраф бўлиб, жаннат неъматига етишадилар. Ана шундоқ буюк хурсандлик кунини бу дунёда нечун ҳафтанинг байрам куни қилиб олинмасин?! 5. «Унда унинг тавбаси қабул қилинди». Яъни жума кунида Одам алайҳиссаломнинг тавбаси қабул қилинди. Тавбанинг қабул бўлиши улкан бахтдир. Тавба қабул қилинмаса, бадбахтлик бўлур эди. Иқобга қолинур эди. Шунинг учун ҳам Одам алайҳиссаломнинг фарзандлари бу кунни ҳафтанинг байрам куни қилиб олишлари зарур. 6. «Унда у вафот қилди». Яъни жума кунида Одам алайҳиссалом вафот этдилар. Имом Ҳоким келтирган ривоятда:«Ўлим мўминларнинг туҳфасидир», дейилган. Чунки ўлим ила мўминлар бу дунё ташвишларидан қутулиб, охират неъматларига эришадилар. Шунинг учун ҳам Одам алайҳиссаломнинг болалари бу кунни ҳафтада байрам куни қилганлар. 7. «Унда қиёмат қоим бўлур. Жума куни ҳамма жониворлар тонг отгандан то қуёш чиққунча (қиёмат) соатини қўрқинч ила кутиб турурлар. Фақат жин ва инс бундан мустасно». Демак, жума куни қиёмат қоим бўлиши мумкин. Шунинг учун ҳар жума куни ўша вақтни ҳамма жониворлар қўрқинч ила ўтказар эканлар. Фақат одамлар ва жинлар ғафлат босиб, бу нарсани ҳис қилмас эканлар. Демак, инсоният тарихида шундоқ муҳим ҳодисалар бўлиб ўтган ва уларни эслаш, улуғлаш, улуғ неъмат деб билиш учун ҳам бу кунни байрам қилишимиз, тўпланиб ибодат, дуо ва илтижо билан ўтказишимиз жуда ҳам зарур. «Ҳадис ва ҳаёт» китобидан олинди.
Мавзуга оид мақолалар
gallery ids9090,9091,9088,9087,9089  Ҳазратим Доктор Ваҳба Зуҳайлини яқин оғайним дердилар. У кишига бўлган муҳаббатлари ўзгача эди. Деярли, ҳар бир  мажлисларида Докторни давоми...

22:26 / 11.02.2017 6219
Бугунги дунё янгиданянги ташвишлар ва муаммоларни келтириб чиқармоқда. Аммо шундай муаммолар ҳам борки, инсоният пайдо бўлгандан буён аёллар бу муаммоларда ҳар давоми...

01:37 / 01.02.2017 4589
«Қудрати ва шарафи чексиз Аллоҳ иймон келтирган қулларини уларнинг хулқидан исёнкорликни кетказиш, ғафлатдан уйғотиш, Ўзига муқарраб қилиб, ишларини ислоҳ давоми...

07:53 / 01.02.2017 9662
Ассалому алайкум, шайx ҳазратлари, илтимос, маслаҳат берсангиз. Биз уйда бироз қурилиш қилган эдик, шунга онам деворнинг бир чеккасига исириқ, тош ва кўзмунчоқ осиб давоми...

07:40 / 09.12.2016 3840