Оилавий муҳит

Ассалому алайкум! Ҳурматли Муслимаат.уз жамоаси! Жавобингиз учун олдиндан раҳмат! Турмушга чиққанимга 4йил бўлди, Аллоҳ кечирсин, ношукрлик қилаётган бўлсам, оиламни камчиликларини очаётганим учун жуда ҳам ҳижолатдаман, лекин ёрдамга, маслаҳатга муҳтож бўлганим учун сизларга мурожаат қиляпман. Шу 4йилдан буён ҳаловатим хотиржамлигим йўқолган.Сабаби, ўзим университетни тугатганман, қизлик оилам маъданиятли, диндан диёнатдан хабарлари бор, Алҳамдулиллаҳ, бизларни ўқитиб, тарбияни ҳам яхши берганлар. Ҳозирги оиламнинг муҳити умуман тескари, ҳар икки уч кунда жанжал, қишлоққа турмушга чиққанман, фақат иш қил уй ишидан ташқари мол, дала ишлари ҳам келинни зиммасида, ҳатто фарзанд тарбиясига ҳам вақт ажратолмайман. Боламни қўлимга олсам қўй болани, иш қил, болани ўзи катта бўлади дейди қайнонам. Ўзи болани жеркиб, қарғагани қарғаган, болам ҳам уйдан безиб қолган бобом-бувимникига(ота-онамникига) кетаман деб йиғлайди. Ўзим китоб ўқигим, боламга ҳам ўқиб бергим, боламга турли сабоқлар бергим келади, лекин уйга кирсам ҳаммани қавоғи уюлиб мен билан жанжал қилаверади, 5вақт намозга баазур кириб чиқаман. Уйда қайнонам нима деса шу бўлади қайнотам ҳам эрим ҳам укалари ҳам қайнонамга бўйсунади, у киши фақат бақир- чақир, биз келинларга буйруқ беради, бажарсак камини топади, бўш вақтида телефонда ёки қўшнилар билан ғийбатлашадилар, энг ёмони биз келинларини болаларига ҳам қариндошларга ҳам, қўшниларга ҳам ёмонотлиқ қилиб ташлаган. Эрим катта ўғил, кўчиб кетайлик, десам у ҳам мени сўкишга тушади ишдан ҳеч ким ўлмайди дейди, мени иш эмас носоғлом муҳит чарчатиб юборди, фарзандларимни келажаги ташвишга соляпти. Нима қилишга ҳам бошим қотган, уларни ўзгартиришга кўп ҳаракат қилдим, лекин барибир эплолмадим, чунки у ердаги нотўғри қараш, нотўғри тарбия чуқур илдиз отиб кетган. Нега бундай ибодатсиз, ахлоқсиз, фақат тирикчилик, ғийбат, жанжал билан умрини зое кеткизаётган оилага келиб қолдим деб афсусланиб кетаман, аммо тақдиримга шу битилган биламан. Мен ва фарзандларим бундай муҳитга мослашиб, тубанлашиб, гуноҳкор бўлиб яшашни хоҳламайман. Илтимос менга тўғри йўл кўрсатингизлар, умримизни мазмунли, хайрли, солиҳ амаллар билан ўтказишимиз учун қандай йўл тутай? Оиламни қандай соғломлаштирай? Ҳаммамиздан Аллоҳ рози бўлсин, Амин!