Ассалому алайкум! Яхшмисиз, ҳозирги кунда қайноталар ҳадеб келиннинг ишига аралашадиган бўлиб қолишди. Ўғлига ёки қайнонасига келининг бундай қилди, буни қилмади, сен ишлаб келгунингча уйда ётди ёки хотининг буни кийяпти, бунақа иш қиляпти деб эр хотин орасини бузиб қўйишяпти. Келинга хўжайинчлик қилишяпти. Шариатимизда қайнота келинга хўжайинчилик қилишга хақлими? Келиннинг кийиниши, юриш туриши эрига ёқаётган бўлса, қайнота нега аралашади, шунга ҳақлими? Сизни ота онангиз тарбия бермаган деб келинни ота онасини ҳақорат қилишга ҳаққи борми қайнотани? Қачонгача келинлар қайнотани деб тинч яшай олишмайди? Жавоб учун рахмат
– Ва алайкум ассалом!Ҳар бир инсоннинг ўзига яраша хулқ-атвори, темпераменти яъни табиати ва феъли бор. Характерлар яъни феъл-атворлар бир-бирига ўхшамайди. Одамнинг характери унга ота-онасининг берган тарбияси, яшаш муҳити, олган таълими, қандай кимсалар билан муносабат қилгани ана шу омилларга биноан шаклланади. Шунинг учун баъзи кимсаларнинг феъл-атворига эътибор қилиб сиқилиб кетиш керак эмас. Айниқса у одам кекса одам бўлса. Чунки одам кексайган сари мия нейронлари шаклланишдан тўхтаган бўлиб, дунёқараши торайиб чегараланиб бораверади. Ёш бола каби тез хафа бўлиб кўнгли нозиклашиб қолади. Бундай одамлардан хафа бўлиш керак эмас. “Хўб бўлади” дея бироз ғамхўрлик қилинса кўнгли эриб меҳрибонлик қила бошлайдилар. Бир-бирини тушуниб бир оилада келишиб яшаш учун ҳар ким бошқа оила аъзосини тўғри қабул қилишга, гина-қудрат сақламасликка, кеча ўтган ишларни эсламасликка ҳаракат қилиши керак. Негаки бунларга амал қилинмаган ҳолда ҳар кимнинг ичида хафагарчилик энергияси яъни қуввати ҳосил бўладики буни атрофдагилар ҳис этиб турадилар ва қилинган яхши муомала ҳам самимий бўлиб туюлмайди. Соҳтадек туюлиб бу каби яхши муомаладан ҳеч кимнинг кўнгли юмшамайди. Катталарнинг ёшини ҳурмат қилган ҳолда гина-қудрат қилмай яшалганда бу сабр ва чиройли муносабат учун савобларга эришилади иншааллоҳ.Бировдан одам қанча хафа бўлса шунча соғлигига путур етади. Инсон соғлигини ҳеч бўлмаса шу йўл билан бўлса мухофаза қилгани маъқул. Бегона уйга келин бўлган аёл шу уйнинг қонун-қоидаларига бўйсунмай иложи йўқ. Албатта шу уйнинг катталари нима деса шунга итоат қилинади агар шариатда ножоиз деб ҳисобланган ишларга буюрилмаса. Келиннинг турмуш ўртоғи аёлини деб ўз отасига қарши бормайди. Чиройлик сабр қилинса келин оила аъзоларининг барчаларини меҳрини қозонади. Аммо зулмга сабр қилиниши керак дегани эмас бу. Валлоҳу аълам!
