– Ва алайкум ассалом! Мактубингизни ўқир эканман то ўзингизни ўзингиз уришингиз ҳақидаги жойига келгунича тасаввуримда меланхолик темпераментининг типик ҳолати айнан шу ҳолат деган фикрда эдим. Ўзингизни уришингизга келсак бу ҳолат адекват ҳолатга тўғри келмайди. Аммо сиз каби инсонлар жуда кўп. Бу ҳолатни талқин қиладиган бўлсак ўзингизни уришингиз баъзи оғриқларга, ҳаддан зиёд оғир бўлган ўтмишдаги хотиралар ва эмоцияларингизга, ёпишқоқ ҳаёлларга қарши курашишдир. Жисмоний оғриқ қалб оғриғидан эътиборни ўзига тортиб реалликка қайтаради. Яъни одам айта олмаган ҳис-туйғуларини ҳатто ўзи учун ҳам тан олгиси келмайдиган баъзи ҳис-туйғуларининг ноодатий ифодасидир бу. Баъзи одамлар учун муаммоларини ечимини топишда шу иш кор қилиши мумкин. Аммо бу баъзи ҳолатлардагина, жуда камадан-кам ҳолатларда юз беради. Албатта ўзингизни яна уриб, майиб қилишда давом этиш бу сизнинг ихтиёрингиз. Лекин бунинг ўрнига ҳаётий муаммоларни ақл билан ҳал қилишингиз мумкин. Яъни инсонлар билан муносабат қуришга, ўзингизга дам бериб бироз бўшашишга, ўз ҳис-туйғуларингизни ифода этишга секин-аста ўрганишингиз мумкин. Табиийки ҳеч ким сизга дарров натижа бўлади деб ваъда бера олмайди. Натижани ҳам секин-аста кўра борасиз. Фақат биринчи ўринда мана шу муаммоларингизни ўзингиз ҳал этишга масъулиятни ўз зиммангизга олиб ният қилишингиз керак. Набодо аҳволингиз янада кескин тус олса у ҳолда психотерапевт шифокорига мурожаат этишингиз мумкин. Валлоҳу аълам!
