Ассалому алайкум! Қилаётган ишларингиздан Аллоҳ рози бўлсин. Турмуш ўртоғим инсофли, ибодатларига эътиборли инсон. Қуръондан таълим оладиган устозлари икки учта хотини бор одам. Ўша одамни таъсирими кейинги пайтда нуқул яна бир аёлга уйланиш ҳақида гапираверадилар. Шу сабабдан ишончим йўқолиб боряпти, ҳар куни ошга кетдим ёки ишдаман деган гаплар билан кеч келади.Уйланган чоғларида ҳам адолат қилмасликлари аниқ. Уйланиб олди деб айтолмайман, лекин хаёлимга шу нарса келаверади. Психологияда одам бир нарсани ўйлайверса, ўша иш охири бўлади деган гап бор. Эҳтимол нотўғри ўйлаётгандирман, лекин Роббимиз бизга тоқатимиздан ортиқ нарсани бермайман деганку. Кундошлик бўлсам деган хаёл келиши билан оёқ қўлим жонсизланиб ўзимга бўйсунмайди. Бу ҳолатим билан эримни яна бир аёлга уйланишига ўзим сабабчи бўлиб қоламанми, бу ҳолатдан қандай чиқиб кетишим мумкин.
– Ва алайкум ассалом! Муслима аёл эркак кишига иккинчи аёлни никоҳига оламан деса қарши чиқа олмайди. Чунки бунга Аллоҳ изн бериб қўйибди. Аммо сиз шунга мажбурсиз демоқчи эмасман. Баъзи аёлларнинг рашки ўта кучли бўлади. Сабаби турмуш ўртоғига ўз мулкидек қарайди. Мусулмон одам унутмаслиги керак ҳар ким вафот этса қабрга ёлғиз кириб кетади. Турмуш ўртоғи билан бирга қўйилмайди. Шунинг учун турмуш ўртоғига гўёки бу дунё сўқмоқларидан биргаликда йўл юрувчи йўлдош деб қрагани маъқул. Аёл киши жонини жабборга бериб фақат турмуш ўртоғи ҳақида ўйлайвериши, унинг ҳаётида қанд каби эриб кетиши керак эмас. Шундай қилса бу каби аёлнинг турмуш ўртоғига қизиғи қолмайди. Аёл киши ибодатларини биринчи ўринга қўйиши, турмуш ўртоғининг хизматларини эса Аллоҳни рози қилиши учун бажармоғи лозим. Турмуш ўртоғига мулк деб эмас умрйўлдош, дўст деб қарагани маъқул. Аёл кишининг ўзининг шахсий ҳаёти бўлиши керак. Унинг яшаётган уйида шахсий чегараланган жойи бўлиши керакки у жойида севган машғулотлари билан шуғулланиши керак. Яъни тикиш-бичиш, китоб ўқиш, расм чизиш, ибодат қилиш каби. Аёл киши турмуш ўртоғининг хизматларидан ва болаларининг тарбиясидан бўшаши билан вақтини ўзининг шахсий ишларига бағишлаши керак. Шундаги ундаги аёллик жозибаси янада кенгаяди. Бу каби аёл турганда эркак киши бошқа аёл ҳақида ўйлай олмайди. Валлоҳу аълам!
