Аёл эрига омонатдир

00:28 / 13.04.2020 | наргиз | 2422
Ассалому алайкум! Саволларни ўқиб, кузатиб бораман, аксари негатив ҳолатдаги аёллар томонидан йўлланган.... Асл сабабини билгандайман... Расулуллоҳ соллаллоҳу алайҳи васаллам “аёл эрига омонат”, деб айтганлар, лекин афсус бизнинг ўзбек эрлари хотинни қандайдир хизматкордай қабул қилишади. Туғамиз, бола парваришлаймиз, бетоб бўламиз лекин ўта камдан-кам ҳолатларда «Онаси дамингизни олинг, ўзизингизни аянг», деган гапларни эшитамиз. Устига устак қайнона, қайнота қош қовоғига қараш, уларнинг хизматини қилиш... Ахир булар осон иш эмас-ку, албатта булар аёл психикасига таъсир қилади... Аёл ўзини тарбия қилишидан олдин эрларни ислоҳга чақириш керак. Шундай эмасми?
Одинахон Муҳаммад Юсуф:

– Ва алайкум ассалом!

Сиз жуда тўғри айтяпсиз. Мени ҳам аёлларимизнинг ҳам қайнона, қайнсингиллар, қайнукалар, қайнота ва ҳам турмуш ўртоғи томонидан зулм кўриши қаттиқ изтиробга солади. Аммо гапимизда давом этишимиздан аввал Шайҳ хазратлари Муҳаммад Содиқ Муҳаммад Юсуф роҳимаҳуллоҳнинг “Бахтиёр оила” китобларига мурожаат этайлик:

“Эркак ва аёлнинг фикрлашлари орасидаги фарқни аниқлаш бўйича янги илмий иш олиб борган, мия вазифаларини ўрганиш бўйича мутахассис жарроҳлар ўзлари эришган янги натижаларни эълон қилдилар.

Уларнинг таъкидлашларича, аёл кишининг мия­си эркак кишининг миясига қараганда ўн олти фоизга кичик экан. Чунки аёл кишининг ҳажми ҳам эркак кишининг ҳажмидан худди шунча ҳажм­да кичикдир. Шунингдек, икковларининг мия­си бир хил вазифани бажарганда ҳам турли услубда бажарар экан.

Мазкур илмий кашфиётларнинг бошқа хулосалари қуйидагилардан иборат:

1. МRА (магнит-резонанс таҳлил) номли мияни суратга олиш жиҳозида аён бўлишича, эркак киши фикр юритганда унинг миясининг муайян қисмигина ишлар экан. Бу жараён муайян қисмда магнит нурлари бўлиб кўринар экан.

Аёл кишининг фикр юритганда эса, магнит нурлари миянинг ҳаммасида кўринар экан. Бу ҳолат, ўз навбатида, эркак киши аёл кишига нисбатан фикрни жамлашга қудратли эканининг далилидир.

Эркак киши аёл кишига нисбатан кўнгилчанликда таъсирсизроқ экани ҳам илмий равишда собит бўлди. Кўнгилчанлик зоҳир бўлиш пайтида аёл кишининг мияси эркак кишининг миясига қараганда саккиз марта кўп ҳаракат қилишини асбоблар кўрсатди.

Соҳанинг мутахассис табибларидан бири шундай дейди: «Мен руҳий ҳолатлар табиби сифатида, эркак кишининг кўнгилчанлиги аёл кишиникига нисбатан оз эканини яхши билар эдим, аммо бу нарса биринчи бор илмий равишда собит бўлди. Фақат бугина эмас, балки, бошқа илмий текширишларнинг натижасига қараганда, эркак киши аёл кишининг кўнгилчанликка оид ҳолатларини мулоҳаза ва таҳлил қилишида ҳам, аёл киши эркак кишининг кўнгилчанликка оид ҳолатларини мулоҳаза ва таҳлил қилишидаги қувватига тенг кела олмаслиги собит бўлди. 

Бу соҳада эркакларнинг биргина устунлиги бўлиши мумкин, у ҳам бўлса, кўнгилга оид изтиробларга ва хасталикларга оз чалинишлари, холос. 

Шунингдек, эркак киши ғазабланганда қўполликка ўтиши, аёл киши эса гапиришга ўтиши, яъни сўз билан орани ислоҳ қилишга ўтиши ҳам собит бўлди.

Магнит тўлқинлари ўқувчи йигитлар ўқиш ва ёзиш даврида миянинг чап тарафини, ўқувчи қизлар эса ҳам ўнг, ҳам чап тарафини ишлатишларини аён қилди. Миянинг чап тарафи мантиқ, ўнг тарафи кўнгилчанлик тарафи экани маълум ва машҳур.

Тажрибанинг исбот қилишича, эркак кишининг мия­си томонларни, масофаларни ва миқдорларни ҳисоблашга мос ва кучли экан.

Ёруғлик ва овозни қабул қилиб оладиган миянинг махсус бўлаклари фаолияти таққослаб чиқилганда, мазкур икки нарсани қабул қилиб олишда эркак кишининг мияси аёл кишининг миясига қараганда секин ишлар экан. Шунинг учун эркак киши жуда паст овозни эшитмас, аёл киши эса эшитар экан. Ёруғликка нисбатан ҳам худди шундай экан. Эркак кишининг мияси мантиқ ва ҳисоб билан машғул бўлганлиги учун, ёруғликни қабул қилиб олишга унчалик аҳамият бермайди. Шунинг учун эркак киши қоронғиликда аёл кишига нисбатан кўпроқ қоқилади. У қадамларни санаш, томонларни аниқлашга уринади. Аёл киши бўлса, қоронғиликда эркак кишига нисбатан яхшироқ кўради.

Ёш улғайиши билан эркак кишининг мияси аёл кишиникига қараганда кўпроқ кичраяди. Йигирма ёшда эркак кишининг мияси аёл кишиникидан катта бўлади. Қирқ ёшда эса, икковларининг миялари тенглашади. Олтмиш ёшда аёл кишининг мияси эркак кишининг миясидан катта бўлиб қолади. Нима учун? Мутахассислар таққослаб кўрсалар, эркак кишининг ёши улғайиши билан унинг мияси кўпроқ қувват сарфлар экан ва шу туфайли кичрайиб кетар экан.

Аёл киши ўзининг аёллик хусусияти ила эркаклар қодир бўлмайдиган иш – ҳомила ва чақалоқнинг шикоятини англаб, уни таҳлил қилишга уста бўлади. Шунингдек, уларнинг баъзи махфий нарсаларни ҳис қилиш, уларни мулоҳоза ва таҳлил қилишга қобилиятлари ўткир бўлади.

Эркак кишининг эса, хавф-хатарни даф қилиш, қийинчиликларни енгиш, ишларни тартибга солиш ва шунга ўхшаш нарсаларга қобилияти кучли бўлди». 

Агар олимлар эркак билан аёлнинг ҳар бир аъзосини ёки ҳужайрасини юқоридаги каби таҳлил қилиб чиқсалар, худди шунга ўхшаш ҳикматларни топишларида ҳеч шубҳа йўқ. Буларнинг барчаси Аллоҳ таолонинг Биру Борлигини, Қодиру Холиқлигини, Ҳакийму Хобийрлигини ва бошқа барча баркамол сифатларини тасдиқловчи белгилардир.” 

  Кўриниб турибдики аёл киши ожиза, латиф, нозик бўлиб яратилган бўлса ҳам, эркакларга нисбатан ақллироқ ва демакки ақлини ишлатиб эгилувчанлик қила олади. Яъни ақлан соғлом аёл ақлан соғлом эркак билан тил топишиб тинч, осуда ҳаёт кечира олади. Психология илмига мурожаат этадиган бўлсак ўз қадрини билган ва шаръий ҳамда конститутцион ҳақ-хуқуқларини ўқиб ўрганган аёл ўзини ақлан соғлом эркак кишига хор қилдириб қўймайди. Агар турмуш ўртоғи ва унинг қариндошлари аёл кишига зулм қилсалар демак бу аёлнинг онги шунга рози, болалигидан онги бунга рухсат берадиган қилиб тарбияланган деган мантиқни ўргатади психология илми. Шу сабаб аёл киши ўз устида ишлаши, онгини ўстириши учун тинмай илм олиши керак. Шаръий хақ-хуқуқларини ўқиб ўрганиши инсонлар уни хор қилиш ҳаёлига ҳам бормасликларига элтувчи ишдир. Негаки инсон илм олар экан бунинг сабабидан уни салобати зулмкорларни “босиб” қўяди. 

 Валлоҳу аълам!