Ассалому алайкум! Ёшим 16 да. Алҳамдулиллаҳ 5 вақт намоз, Қуръон ўқийман. Ўзимга ўзим хар доим уни қилмайман буни қилмайман деб ваъда бераман, лекин устидан чиқолмайман. Қуръон тафсирини ҳам ўқийман, аммо қалбим тез ўзгариб қолади. Гоҳ илмга берилиб кетаман, гоҳ чалғиб қалбим оммавий ҳаётга бурилади. Мусиқа эшитиш гуноҳлигини биламан. Аммо баъзида эшитгим келади ва эшитиб юбораман. Тез ўзгарувчанман. Сингилларимга ҳам яхши гапирмайман, баъзида қўл кўтариб юбораман. Кўчада яхши хулқда юраман, уйда эса бунинг акси бўлади. Ўзимни ўзим ҳеч тушуна олмаяпман. Баъзида гуноҳ ишлигини билсам ҳам қўл уриб қўяман. Қандай қилиб бундай ёмон иллатдан қутулсам бўлади? Жавоб учун олдиндан рахмат. Аллоҳ сизлардан рози бўлсин.
– Ва алайкум ассалом! Сиз нафсингиз билан курашяпсиз. Аслида инсоннинг бу оламга келишидан мақсади ҳам нафсни енгишдир. Асосийси бу йўлда тўхтаб қолманг. Шайтон васваса қилиб туриши ҳам сизнинг иймонингиз борлигидандир. Айниқса уйда бир ўзингиз бўлганингизда зўраяётган экан. Уйга доимий Аллоҳнинг каломини қўйиб қўйинг. Кўп-кўп истиғфор айтиш ва намозда Аллоҳдан иймонимизни мустаҳкамлаши ва нафсимизни енгишимизда мадад беришини сўраш керак. Кучли бўлинг. Барибир уддалай олмаяпман деб маҳзун бўлманг. Аксинча истиғфорда бардавом бўлсангиз иншаллоҳ аста секинлик билан ўнгланиб бораверасиз. Валлоҳу аълам!
